Lo lus "Lus Hmoob Ciaj Sia" yog Txiv Plig Nyiaj Pov ua tus xub hais tawm kom peb Hmoob yuav tsum tig rov los tsim peb cov lus Hmoob, thiab rov los hais lus Hmoob ib tsam ploj lawm. Txiv Plig hais tias: Lwm haiv neeg, luag tuaj nyob teb chaws no, luag txawm tsis kawm, txawm poob lus lawm los, luag muaj ib lub teb chaws, muaj cov neeg hais luag hom lus. Muaj ib hnub twg, cov poob lus lawm mam rov mus kawm dua los tau. Peb cov Hmoob mas tsis muaj teb chaws. Cov nyob teb chaws vam meej yog cov yuav muaj peev xwm, muaj txuj, lawv yog cov yuav tuav lus Hmoob mus yav tom ntej.

Yog koj tus uas tseem nyeem phab ntawv no ras txog, koj yuav tau npaj ib txoj kev saib koj yuav khaws koj cov lus Hmoob li cas thiaj li yuav tsis ploj. Koj yuav tsim li cas koj thiaj muaj lus Hmoob hais raws tau cov txuj tshwm sim.

Muaj tus puav, kawm txuj siab hauj sim, xav hais tias nws txawj txaus, nws tib leeg thiaj muaj peev xwm, nws muaj cai muab cov ntawv Hmoob kho lwj kho liam, ntxiv ntau tus ntawv, ntau lub cim, cia li yuav kom sawv daws siv. Txiv plig Nyiaj Pov hais tias: “nws yuav tsum siv cov txuj ci tsim ntawv (linguistic/phonetic) los kho kom haum raws neeg vam meej nyob ntiaj teb no los kho pev cov ntawv Hmoob. Peb tsis txhob kho raws li peb tus kheej xav tau xwb”.
Peb nyuam qhuav kawm neeg toob fab ntawv, paub neeg toob fab lus, peb twb paub tsis meej, txawj tsis txaus, peb yuav kho lwj liam mas, luag yuav thuam thiab luag peb xwb. Peb cov lus Hmoob yog ib cov lus txawv ntiaj teb neeg cov lus. Peb cov lus Hmoob yog ib hom lus uas tsis muaj haiv neeg twg yuav piv tau. Peb cov lus Hmoob muaj 8 lub suab. Ib lub suab, muaj ib lub ntsiab, ib lub suab hais tau ib lo lus txawv lwm lo lus uas muaj lwm lub suab, zoo xws li: Tuab, tuam, tuaj, tuav, tua, tuag….
Zoo siab tias muaj ib feem ntawm peb cov Hmoob, tsis hais nyob lub teb chaws twg, tsis hais poj niam los txiv neej, lawv yog ib cov neeg thoob tsib, neeg to taub, neeg ntse raws ntuj tsim teb raug, lawv tseem muaj lub zeem muag hlub yus haiv neeg. Lawv yog cov yuav nrhiav tau kev vam meej rau peb tus “Ntawv Hmoob Thoob Teb” (Ntawv Hmoob Las Tees) no kom muaj paus muaj ntsis thiab caum tau kev vam meej.

Muaj zoo tswv yim, muaj lus nug, sau ntawv los hu rau:
Txhiaj Vwj Yaj
xiavueyang1@gmail.com
(920) 946-0467